Гады зямныя —
На вадзе кругі.
Змятае час
Мітрэнгаў нашых смецце.
Жыць —
Значыць Богу аддаваць даўгі.
Хто без даўгоў,
Таго няма на свеце.
Кароткая сцяжына да бяды.
Дарога да бясхмарных дзён
Даўгая.
Нас даганяюць нашыя сляды,
Каб нагадаць,
Што мы жывем даўгамі.
Рака наноў
Шукае берагі.
Буцян ладзьбуе
Гнездзішча на коле...
Жывыя могуць аддаваць даўгі.
Таму жыццё й не скончыцца
Ніколі!