Над тымі...

Яшчэ не ацэнена
                                    Пастаў над імі бязбожнага,
                                    і д'ябал хай стане
                                    праваруч яго.
                                                            Псальм 108:6

Над тымі,
Што назваліся людзямі
I рохкаюць галодна ля карыта,
Пастаў бязбожнага,
Няхай яны
Плывуць ракою забыцця ладдзямі,
Няхай спяшаюцца парнакапыта
Падставіць хілы хіб пад бізуны.

I праваруч ад самаўладца-хама
Самога д'ябла ў чорным ахінале
Пастаў,
Няхай пасведчыць чарадзе
I светласць хама,
I сваю таксама.
Каб дзякуй і за кратамі казалі
Бязбожніку,
Што ў шчасце іх вядзе.

А тое шчасце —
Мешанка густая
I рэдкая,
А тое шчасце ў спрыце,
У звадах за харчы перамагчы.
Абы не хутка ўбачыць
Дно ў карыце.
А дасць мароз,
Як адарваць лычы?