Са мной паміраціме...

Сярэдняя: 3.7 (3 галасоў)
                                    Калі я пайду далінай
                                    смяротнага ценю...
                                                    Псальм 22:4

Са мной паміраціме
Цень мой жывы.
I цень мой
Нябожчыкам стане таксама,
Зачыніцца глуха нябесная брама,
Не ўбачу ў даліне
Ні хмар, ні травы.

Паселіцца вечная ноч уваччу.
Сваё адхвалююся,
Адлетуценю.
У змрочнай даліне
Смяротнага ценю
Я з ценем сваім развітацца хачу.

Бо цень быў
Напарнікам мне і віжом,
Сачыў, віжаваў,
Дзе б ні жыў пры святле я.
У зябкай даліне
I цень мой скалее,
Не выпырхне ні вераб'ём,
Ні стрыжом.

На сцежцы стаптанай
I на ярыне
Кунежна слядам
I нястрымна трымценню.
I покуль жывы, давяраюся ценю,
Бо ценіцца цень
I дрыжыць за мяне.